Алтай тилдиҥ кӱндери Кӱпчеген јурттыҥ детсадында

«Jаркынду jылдыстаҥ кӱйген, алтай албатыныҥ оморкодузы болгон бичиичи» деген ууламjыла алтай тилдиҥ ле Л.В. Кокышевтиҥ 85 jажына учурлалган кӱндери Кӱпчеген jурттагы «Солнышко» деген детсадында ӧткӧн. Кӱпчеген jурт су-алтай тилдӱ jурттардыҥ бирӱзи болуп jат, оныҥ да учун детсадка jӱрӱп турган балдар тӧрӧл тилиле сӱреен jакшы куучындашкылап турганы оморкодот. Мындый айалга оноҥ до ары улалып барары эне-аданыҥ камааны болуп jат ла ондый болор учурлу. «Аш кылгада, бала jашта» деген кеп сӧстиҥ учурыла болзо, тӧрӧл тили керегинде тоомjылу сӧстӧр jаш баланыҥ санаа-укаазына шиҥилип калары jаандарынаҥ камаанду.
Нениҥ учун «jылдыстаҥ кӱйген бичиичи» деген оҥдомолды jартап аларга таскадаачылар балдарла кожо поэттиҥ jаш тужыла сӱр-jурук презентациялар ажыра таныжып, бичиктериниҥ выставкаларын кӧрӱп, ветеран-ӱредӱчилердиҥ алтай тил ле алтай классик-бичиичилердиҥ ӱлгерлериниҥ ӱзӱктерин эске ӱренгендер. Jурт jеезениҥ библиотеказына барып, jаҥы чыккан бичиктериниҥ ады-jолыла танышкандар. Библиотекарь Клара Естеевна Кухаева болчомдорло кожо jарт-чокым куучын — эрмек ӧткӱрген.

Ж.Ю. Кебекова,
школго белетеер группаныҥ таскадаачызы
Автордыҥ фотојуругы

Комментирование и размещение ссылок запрещено.

Комментарии закрыты.