Балдар терроризмге удура

Шашыкман jурттыҥ клубында терроризмле тартыжуга учурлалган «Мы против терроризма» деп куучын – ойындарды 4 ле 5- чи класстыҥ ӱренчиктериле кожо јурттыҥ библиотеказы ӧткӱрген.
14 jыл кайра, Сыгын айдыҥ 3-чи кӱнинде Тӱндӱк Кавказта Беслан городтыҥ баштапкы таҥмалу школында баштапкы кӱзӱҥиниҥ байрамына jуулган ӱренчиктерди, эне – адаларды, ӱредӱчилерди террористтер олjолоп, кыйнап ӧлтӱргендер. Бистиҥ балдарга бу канду кӱнде болгон керектерди куучындап, jартадыс. Бӱгӱнги кӱнде амыр – энчӱ jуртаарга турган болзобыс, терроризмге удура тартыжар керек деп балдар оҥдогон. Бу кӱнде божогон улусты эзедип, олор бир минут унчукпай турдылар.
Оноҥ ары балдарга «Слер тӧрӧлистиҥ коручылы болор кӱӱнигер бар ба?» деп, сурак бердибис. Балдар jаҥыс ӱнле бойыныҥ кӱӱнин колын ӧрӧ кӧдӱрип кӧргӱстилер. «Тӧрӧлистиҥ коручылы болорго кандый болор керек?» деп суракка балдар: «Коручыл болорго кӱчтӱ, jалтанбас, jӱгӱрик, кандый ла айалгадаҥ чыга берер сӱмелӱ болор керек» — деп айдып бердилер.
Терроризм керегинде куучынныҥ кийнинде балдар эки командага бӧлиндилер. Баштапкызы –«Кӱничек», экинчизи «Чолмон» деп адандылар. Капитандар Ямангысов Айат ла Челбаков Кайрат. Баштапкы ченелтеде командаларга «миналу јалаҥды» бир кижиниҥ изиле бастыра команда бир де туура баспай, ӧдӧтӧни болды. Экинчи ченелтеде капитандар маргыштылар. Обручты кийип, бойыныҥ командазында кажы ла баланы бирдеҥ обручка кийдирип, темдектеп салган jерди ӧткӱрер керек болды. Аргадаачы — спасатель болуп турган капитандар анайып бойыныҥ командазыныҥ балдарын кечирип ойнодылар. Бу ойындар балдарга сӱреен jараганы балдардыҥ эрчимдӱ туружып турганынаҥ билдирлӱ болды.
Оноҥ ары эки командага таныктар ӱлеп, «Мы против экстремизма и терроризма» деп эрмек тургуссын деп сурадыс. Мынайып балдар таныктарды талдап, коркышту капшай бу эрмекти тургузып ийдилер.
Ойындар ажыра балдар бойыныҥ коркыбазын, кӱчтӱзин, капшуунын, jалтанбазын, Тӧрӧлиниҥ коручылдары болорго белетенип тургандарын кӧргӱстилер. Бу ойындарда эки команда теҥ – тай тартыжып, учында наjылык jеҥген деп айттылар.
Балдардыҥ jӱрӱминде мындый королтолу, коронду учуралдар болбозын, Алтайыстыҥ ӱстинде амыр – энчӱ jӱрзин деп кӱӱнзейдибис. Балдарла кожо туштажубыс «Пусть всегда будет солнце» деген кожоҥло тӱгенди.

Тебекова Ф. Т.,
клубтыҥ директоры

Комментирование и размещение ссылок запрещено.

Комментарии закрыты.