Г. И. Чорос-Гуркинниҥ адыла адалган јондык сыйдыҥ ээчий лауреаттарыныҥ ады‑јолы адалды

Олор — Горно-Алтайсктагы университеттиҥ преподаватели Эркемен Ядагаев ле «Солнечная энергия» деген ООО-ныҥ генеральный директоры Андрей Ялбаков.
Сыйды табыштырар кӧдӱриҥилӱ јуун јаҥар айдыҥ 12-чи кӱнинде Чамал аймактыҥ Онос јуртында, улу Чоростыҥ јуртаган ла иштеген айыл-јуртында ӧткӧн.
Мынаҥ озо јылдарда бу сыйды республиканыҥ јайаан, билим ле спорт бӧлӱгинде иштеген улус: билимчилер, кайчылар, кожоҥчылар, ӱлгерчилер, артисттер, албаты устары ла спортчылар алып туратан болзо, баштапкы ла катап сый экономика бӧлӱкте иштеген улуска берилген. Эркемен Ядагаев ле Андрей Ялбаков ӱредӱзи аайынча энергетика бӧлӱктиҥ специалисттери деп, «Алтайдыҥ Чолмоны» газет јетирди.
Бистиҥ аймактаҥ бу учурлу ла баалу сыйды аларга алты кижиниҥ ортозында ченелтеде Россияныҥ албаты узы Аржан Кухаев турушкан. Ол ончо ого јӧмӧшкӧн улуска быйанду сӧстӧрин јетирип, мынайда айтты: «Г.И. Чорос-Гуркинниҥ адыла адалган јондык сыйдыҥ талдаштарында меге бӱдӱмји эдип јерлештерим ле тӧрӧӧн-туугандарым јӧмӧшкӧнине сӱӱнип ле оморкоп турум. «Кижи кижиле бай» деп, тегиндӱ айдылбаган эмей. Алтай калык бой-бойын јӧмӧжип, ондый ла нак, тоомјылу болзын деп кӱӱнзейдим. Мынаҥ да ары јайаандык ижимди тура салбай, албатыма, Тӧрӧлиме тузалу болорына албаданарым!».
Јерлештердиҥ адынаҥ быйанду самаразын Курматова Л.Я. аткарган. «Бу јондык сыйдыҥ кажы ла туружаачызы – ол эл-јонныҥ, кичинек Тӧрӧлиниҥ тоомјызын, ады-јарын кӧдӱрген улус болуп јат. Олордыҥ тоозында бистиҥ јерлежис Аржан Кухаев. Акту кӱӱнибистеҥ Аржанга јаан бӱдӱмји эткен јерлештериске «Ажуда» газет ажыра јаан быйанысты јетиредибис. Су-кадык, амыр-энчӱ јӱригер!».
Оныла коштой Аржан Кухаев Г.И. Чорос-Гуркинниҥ јондык сыйыныҥ лауреаттарына тӧжине тагынып јӱрер темдек ле «Оностогы кӱрее» деген кӧмзӧниҥ Кӱндӱлӱ турчыларына тагынып јӱрер алтын-мӧҥӱннеҥ эткен медаль кеберлӱ темдектердиҥ авторы. Jондык кӧмзӧ Аржан Кухаевке «Оностогы кӱреениҥ» адылу узы» деген ат адап јат. Анайда ок кӧмзӧниҥ мындый темдектерин мынаҥ ары јӱк Аржан Вячеславович белетеер тап-эриктӱ болор.

Корр.
Фотојурукта: Г.И. Чорос‑Гуркинниҥ адыла адалган сыйдыҥ лауреаттары Эркемен Ядагаев ле Андрей Ялбаков

Комментирование и размещение ссылок запрещено.

Комментарии закрыты.