Короты јуртта Аржан Кӧзӧрӧковтыҥ музейи ачылар

Аржан Кӧзӧрӧковты алтай калыкка
арјанынаҥ Кудай берген…
«Кайчыгарды сӱӱгер,чеберлегер»- деп,
ак-айаста Јайаачы јакыган.
Н. Енчинова,
Улаган јурт

Алтайыстыҥ ады јарлу Эл кайчызы Аржан Кӧзӧрӧковтыҥ јӱрӱми јиит ӧйинде јеткердеҥ улам ӱзӱлгенинеҥ бери алты јыл ӧтти.
Алтайдыҥ аржан-кутук суузындый ак-чек санаалу эмчи, ады јарлу эл кайчы ого баштангандардыҥ кажызына ла алкыжын, болужын јетирерине албаданатан. «Аржан бу кыска јӱрӱминде сӱрекей јаан иш бӱдӱрип койгон. Бу кижи алтай албатызыныҥ оморкодулу ла тоомјылу уулы болуп артар. Алтай элдиҥ адын бийик кӧдӱрген Аржанга јаан быйан» — деп, калганчы јолго ӱйдежип турарда айдылган эди.
Ӱлӱрген айдыҥ 16-чы кӱнинде 14.00 саатта кайчыныҥ тӧрӧлинде – Короты јуртта эл тӧрӧӧндӧри, нӧкӧрлӧри, јерлештери, анайда ок Оҥдой аймактыҥ культура бӧлӱгиниҥ ле Караколдыҥ јурт јеезезиниҥ администрациязыныҥ ишчилери јуулыжып, Аржан Кӧзӧрӧковтыҥ эземин кереестеп, јаткан айылында јаан эмес музей ачар деп шӱӱлтеге келдибис.
Ончо јерлештеристи, јилбиркеген улусты музейдиҥ ачылтазына турушсын деп кычырадыбыс.

Тӧзӧмӧл кӱрее

Комментирование и размещение ссылок запрещено.

Комментарии закрыты.