«Мой адрес Советский Союз» Јоло јуртта

Јаан јашту улустыҥ текши телекейлик, окылу ла бийик кеминде темдектелип турган айлыгы ол ӱлӱрген ай. Оныла колбой, бир айдыҥ туркунына бистиҥ Јоло јуртыбыста башка – башка иштер ӧткӱрилген.
Темдектеп алза, школдыҥ ӱренчиктери «Аҥчы ла оныҥ командазы» деп акцияла јаан јашту улустыҥ айлы-јуртына барып, олорго болушкандар. Јурттыҥ јаан јаштуларын школго кычырып, олордыҥ кӱч те болзо, солун ла эмдиги ӧйдӧҥ чек ӧскӧ јӱрӱми керегинде эске алыныш куучындарын угуп, олордоҥ тем алып ӱренгени болот. Онойдо ок, ӱлӱрген айдыҥ баштапкы кӱнинде јурттыҥ библиотекари Клара Амыева јаан јаштуларды јууп, музейдиҥ ишчизиле кожо «Искусство быть здоровым» деп солун туштажу ӧткӱрген. Јуулган улус бойыныҥ су — кадыгын кандый эп – сӱмелер тузаланып, чеберлеп алар кӧп тоолу аргалар бар болгоныла танышкан. Социальный ишчи Эркелей Чучина бойыныҥ планы аайынча иштеп, айылдаҥ чыгып болбос карганактарга айылдап, олордыҥ бары — јогын угужып, сурактарына каруу бергени болот. Оноҥ до ӧскӧ карганактарла колбулу иштер эдилип, јаан јаштулардыҥ айлыгы јаан ойын – јыргалла тӱгенди.
Јараш кӱстиҥ ӱлӱрген айыныҥ 26-чы кӱнинде, аржан суулу, арчын јытту Алтайыста, Коркобы, Јоло, Кайырлык јурттарда јадып турган јаан јаштулар Јолодогы культура байзыҥына јуулып, озо ло баштап јерлештериниҥ белетеген концертин кӧрдилер.
Јуулган улуска уткуулду сӧсти Јолодогы јурт јеезениҥ јааны Аркадий Ялбаков айтты. Бойыныҥ кӱчин, су – кадыгын, билгирин албатызыныҥ ӧзӱмине, јаш ӱйеге берген јаан јаштуларга алкыштар айдып, су – кадык кӱӱнзеди. Ээчиде уткуулду сӧстӧрин аймактыҥ Соведине јаҥыдаҥ тудулган бистиҥ эки јиит депутаттар Аткыр Амыев ле Анатолий Атаров ээчий – деечий айттылар. Онойдо ок, бу ӱч кижи — байрамды ӧткӱрерге болужын јетиргенин аҥылап темдектеп, ончо байрамныҥ туружаачыларыныҥ адынаҥ јаан быйанысты айдадыс.
Концертте Коргобы јурттаҥ келген Ирина Челбакова «Кызыл эҥир», «Доброе утро», Любовь Тудуева «Как не любить мне эту землю» деп кожоҥдорыла јаан јаштуларды уткыды. Залга јык толо улуска «Јоло» ӧмӧлик «Јеҥелер», «Посидим по хорошему», «Ах судьба – судьбинушка» деп кожоҥдорын сыйладылар. Јолоноҥ Оксана Эндокова коо јараш ӱниле «Јуртымда тӱн» ле «Я не могу иначе», Суркун Албанов «Алас» деп кожоҥдорын кожоҥдодылар. «Маска» деп ӧмӧлик (Байару Темденова ла Ольга Аныева) сценкада эр улустыҥ јӱрӱминеҥ алынган ӱзӱкти кӧргӱзерде, залда отурган улус ичин тудунганча, кӧстиҥ јажы агып келгенче каткырышты.
Бу мындый кӧдӱриҥилӱ айалгада байрамныҥ баштапкы бӧлӱги тӱгенген. Казан – айак тудунган келиндер кӱндӱ – кӱреени оноҥ ары улалтып, отурган улусты амтанду ӱстӱ – јуулу курсагыла кӱндӱлеген.
Ӱчинчи бӧлӱкле «Мой адрес Советский Союз» деп адалган ойындарды мен, музейдиҥ ишчизи, ӧткӱрдим. Бу ойындар Советский Союзтыҥ ӧйинде кичинек балдар ойногон ойыннаҥ башталды. Јаан јашту улус кичинек балдар чилеп «У-у-у-у-у» деп улужып, колдорыла талбынып, бой – бойын кӧрӱп, каткырышкылап турды. Ээчиде ойын «Что – почем?» деп адалган. Мында Совет ӧйинде не – немениҥ баазын эске алынып, чокымдап, чын баазын тургусканы болды. Оноҥ ары «Ретро» деп ойынды модный баттл деп сӧслӧ баштадыс. Мында кажы ла стол берилген јакылтага кожоҥло каруузын берип турды. Бастыра кожоҥдор алтай ла СССР ӧйиниҥ болгонын аҥылап темдектеер керек.
Ойынныҥ учында Любовь Александровна Кыпчакова «Мен деремненеҥ чыкпас, ары – бери јӱрбес кижи, байрамга келгениме сӱӱнип јадым. Ойноп турала, јаш тужыма барып келдим ошкош. Арка – сыным јеҥилип, кӱч кожулды, јажаган јажым он јашка астай берди ошкош. Байрамды ӧткӱрген улуска јаан быйаным айдып јадым» — деп каткырып, оноҥ ары дискотекада бијелеп турды. Светлана Николаевна Содонова база кӧдӱриҥилӱ кӱӱн – санаалу: «Байрамда курсак – тамак, ойын, концерт ӱзе јакшы болды. Бистиҥ јурттардыҥ јаан јаштулары кожоҥчы да, ойынзак та улус ине. Тойо ойноп алдыбыс. Јылдар сайын јаҥжыгу болуп калган байрамыс эзенде јылда мынаҥ јакшы болзын» — деди.
Бу ойын – соот байрамды ӧткӱрерге эрчимдӱ турушкандарды темдектеп ийели, олор: ӱч јурттыҥ библиотекаларыныҥ ишчилери, амтанду курсагын аскан казанчылар; јурт јеезениҥ администрациязыныҥ ишчилери, изӱ, ӱстӱ – јуулу курсакла јуулган улусты ӧйинде азырап, кичееген улус; культураныҥ ишчилери –концерт ле солун ойын – соот ӧткӱрген улус болот.
Јурттардыҥ јаан улузын байрамла уткып, олорго учуктый узун јӱрӱм, кайа – таштый бек су – кадык кӱӱнзейдим. Айыл – јуртаарга амыр – энчӱ, айас теҥери кӱӱнзеп, бала – баркага баш болуп, база да узак јаш јажазын деп кӱӱнзейдим.

Мандаева Б.Т.

Комментирование и размещение ссылок запрещено.

Комментарии закрыты.