Јаан јаштулардыҥ кӱндери Ӧлӧтӱ јуртта

Кажы ла јыл ӧткӱрилип турган Јаан јаштулардыҥ кӱнине учурлалган Айлык бистиҥ Ӧлӧтӱ јуртта ӱлӱрген айдыҥ тӧртинчи кӱнинде «Городки» деп спорттыҥ бӱдӱминиҥ республикан маргаандарыла башталды. Бу тартыжуда баштапкы јерди Кӧксӱ- Оозынаҥ эр улустыҥ командазы алды, экинчи јерди ол ло аймактыҥ эпшилери, ӱчинчи јерди Ӧлӧтӱ јурттыҥ командазы алды. Маргаандарды баштап ӧткӱрген, туружаачыларды ончо немеле јеткилдеген кижи Ороев Юрий Константинович.
Ӱлӱрген айдыҥ бежинчи кӱнинде аймактыҥ Спартакиадазында туружып, бистиҥ ветерандар сегис команданыҥ ортозынаҥ баштапкы јерге чыктылар. Јылдыҥ ла бу маргаандарга туружып, јеҥӱчилдердиҥ тоозына кирип турган Ороевтердиҥ билезин – Юрий Константинович, Артур Константинович, Августа Витальевна, Альбина Витальевнаны, Арчанов Павел Сабаевичти, Кинов Григорий Ивановичти, Можонов Олег Сергеевичти темдектеер керек.
Ӱлӱрген айдыҥ јирмезинчи кӱнинде Лазарь Васильевич Кокышевтиҥ 85 јажына учурлалган туштажу-эҥир клубта ӧткӱрилди. Ӱренчиктер ле јаан јаштулар ӱлгерлер кычырып, кожоҥдор уктыбыс. Лазарь Васильевич эзен јӱрерде, ого јолыгып, кӧргӧнин-укканын јаан улус эске алынып, куучындагылады.
Ӱлӱрген айдыҥ јирме бежинчи кӱнинде туштажу-байрам ӧтти. Мында уткуулдар айдылып, толо јажына јеткен јерлештериске сыйлар берилген. Ойын-маргаандар ӧткӱрилген, оноҥ чайлаш, куучын-эрмек кӱйбӱреп, кожоҥдор чӧйилген. Бу байрамда бистиҥ јурттыҥ јаҥы тудулган депутаттары туружып, болужын јетирдилер.
Арт учында Айлык ӱлӱргенниҥ јирме тогузынчы кӱнинде комсомолдыҥ 100 јылдыгына учурлалган туштажу-эҥирле тӱгенди. Бу байрам кӱндерде туштажып, кокыр-куучынын јайып, јиит ӧйлӧриниҥ кожоҥдорын, иштеген, јӱрген јӱрӱмин эске алынып, бисле кожо сӱӱнип, каткырыжып отурган јаан јаштуларысты кӧрӧргӧ кандый јакшы. Олор: Сибиргеева Нина Пантелеевна, Лепетова Людмила Константиновна, Ороева Нина Тяловна, Минеева Нина Ивановна, Мунатова Наталья Павловна, Медведева Зоя Сакпаевна ла оноҥ до ӧскӧлӧри. Ончогорго су-кадык, айыл-јуртыгар амыр-энчӱ, санаа-кӱӱнеер бийик болзын деп кӱӱнзейдим.
Бу ӧткӧн туштажу-эҥирлерди белетеп ӧткӱрген клубтыҥ ишчилерине Арчанова Лидия Леонидовнага, Санзарова Алена Вячеславовнага, јурттыҥ библиотекарине Баянкина Нина Чумдеевнага јаан быйаным айдып турум.

Елебесова Т.Б.
Автордыҥ фотојуругы

Комментирование и размещение ссылок запрещено.

Комментарии закрыты.