Јӱрегер качан да карыбазын

Јаҥжыккан аайынча, кӱреҥ кӱсте ӧткӱрилип турган, Јаан јаштулардыҥ байрамы Јаан Јаламан јуртта сӱреен јилбилӱ ӧтти.
Быјыл бистиҥ јурттыҥ јаандары аймак кеминде ӧткӱрилип турган Спартакиадада баштапкы катап туруштылар. Чийбунов Сергей Николаевич баштаган команда волейбол ойноп, эҥ учында да болгон болзо, је кандый тузалу ла јилбилӱ ӧйди ӧткӱрдилер. Ол ло команда, јаанактар: Ептеева С.Ф., Чийбунова А.Б., Одонова М.Б., Манатова В.А., Бодуева Э.К., Ялмашева Т.Я., Алмашева Р.В., Бабитова Р.В. бойлорын јӱгӱриште, дартста, армакчы тартарында ла качан да ойнобогон «городки» деп ойында ченегиледи.
«Јӱрегер качан да карыбазын» деп байрамда кӧдӱриҥилӱ айалгада толо јаштары кирген јаандарды уткып, јаан эмес сыйларысты табыштырдыс.
Бу кӱн электроот ӧчӱп те калган болзо, јуртадминистрация генератор экелип, байрам улалып, «Параллель» деп ӧмӧлик бойыныҥ јараш концертиле улусты сӱӱндирди. Артисттерди бистиҥ јуртка ийип, албатыныҥ кӱӱнин кӧдӱрген аймактагы культураныҥ тӧс јериниҥ јааны Марина Олеговна Емикеевага јаан быйанысты айдып турубыс.
База бир сӱӱндирген неме – ол јорыкташ — экскурсия. Кӱпчеген јурт јеезениҥ јааны Владимир Павлович Мандаев Бийск калага јетире барарга «ГАЗель» кӧӧлик берген. Јолойын јаан јаштулар Сростки јуртта В.М. Шукшинниҥ ле Горно-Алтайскта республикан эл музейдиҥ сонуркак кӧрӧӧчилери болдылар. Бу јорукты јӧмӧп болушкан республиканыҥ депутады Вячеслав Николаевич Ухановко бийик ажулардыҥ алкыжын кӱӱнзейдибис.
«Јаштар биске неме бе эди» деген конкурста Кӱпчеген ле Јаламан јурттардаҥ «ООН» ло «Листопад» командалар тартышты. Интеллектуальный деген конкурста Кӱпчеген озолоп ийген болзо, «Мениҥ јаанам артист» деп номинацияда Јаламан јеҥди. «Сӱӱнчилӱ јарыштар» озолу — соҥду болды. Текши конкурстыҥ јеҥӱчили болуп Кӱпчегенниҥ јаанактары чыктылар.
Анайып Јаан јаштулардыҥ Айлыгы тӱгенди. Бу учурлу Айлыкты ӧткӱрерге јӧмӧп-болушкан Кӱпчеген јурт јеезениҥ администрациязына, ветерандардыҥ јаандарына – Манышева Е.С., Ептеева С.Ф., Манатова В.А., јурттыҥ депутады Тыхынов Э.В., аймактыҥ депутады Огнев Ч.Г. ла јурттыҥ эл-јонына јаан быйан айдып турубыс.

 

С. Кытышева

Комментирование и размещение ссылок запрещено.

Комментарии закрыты.